Վարչական վարույթ

Վարչական վարույթ

Հայաստանի Հանրապետության կրթության տեսչական մարմինը, առաջնորդվելով իր վերահսկողական և կանխարգելիչ գործառույթներով, ՀՀ ԿԳՄՍ նախարարությունից ստացված գրությամբ՝ քաղաքացուց ստացված դիմումի հիման վրա, իրականացրել է ուսումնասիրություն Հայաստանի Հանրապետության Լոռու մարզի N միջնակարգ դպրոց պետական ոչ առևտրային կազմակերպությունում՝ պարզելու դիմումում նշված փաստերի իսկությունը և կրթության կազմակերպման օրինականությունը։ Ուսումնասիրության նպատակն էր պարզել դիմումում նշված փաստերի իսկությունը, պարզել դպրոցի պատասխանատու անձանց գործողությունների համապատասխանությունը գործող օրենսդրությանը և ապահովել սովորողի կրթական իրավունքների պաշտպանությունը։

Վարչական վարույթի արդյունքում հաստատվել է, որ՝

1. Դպրոցի հոգեբանը մասնակիորեն է իրականացրել իր գործառույթները․

• չի բացահայտել սովորողի ինքնահաստատմանն ու ինքնադրսևորմանը խոչընդոտող հանգամանքները,
• չի իրականացրել հոգեբանական խորհրդատվություն և վերականգնողական աշխատանքներ,
• 2025 թվականի հունվարից չի մասնակցել աշակերտի անհատական ուսումնական պլանի (ԱՈՒՊ) իրականացմանը,
• ինչի հետևանքով սովորողը զրկվել է ԱՈՒՊ-ով սահմանված հոգեբանական աջակցությունից։

Խախտվել են՝

• ՀՀ կառավարության 2023 թվականի փետրվարի 16-ի N 216-Ն որոշման «Հանրակրթական հաստատության աշխատողի պարտականությունները» հավելվածի՝
• 5-րդ գլխի 1-ին կետի 5-րդ և 7-րդ ենթակետերը՝

   «Հայտնաբերում է երեխայի անձի կայացումը (ինքնահաստատում և ինքնադրսևորում) դժվարացնող պայմանները, օգնում է սովորողին, մանկավարժներին և ծնողներին՝ հոգեկան առողջության հետ կապված խնդիրների հաղթահարման հարցում»,
«Մասնակցում է կրթության առանձնահատուկ պայմանների կարիք ունեցող սովորողների ԱՈՒՊ-ների իրականացման գործընթացին»,

• նույն հավելվածի 1-ին գլխի 1-ին կետի 13-րդ ենթակետը՝

«Տնօրենը վերահսկում է հաստատության մանկավարժական և այլ աշխատողների պարտականությունների պատշաճ կատարումը»։

1. Դասվարն ուսուցման գործընթացում չի կիրառել սովորողների անհատական կարիքներին և ուսուցման առանձնահատկություններին համապատասխան մեթոդներ և տեխնոլոգիաներ, ինչի հետևանքով նվազել է դասապրոցեսի արդյունավետությունը։

Խախտվել են՝

• ՀՀ կառավարության 2023 թվականի փետրվարի 16-ի N 216-Ն որոշման հավելվածի՝
• 4-րդ գլխի 1-ին կետի 21-րդ ենթակետը՝

«Համագործակցում է ուսուցչի օգնականի հետ՝ սովորողների ուսուցման արդյունավետ մեթոդների ու տեխնոլոգիաների ընտրության և անհատականացված մոտեցումների պլանավորման աշխատանքներում»,

• ինչպես նաև նույն հավելվածի 1-ին գլխի 1-ին կետի 13-րդ ենթակետը (տնօրենի կողմից վերահսկողություն դպրոցի աշխատողների աշխատանքային պարտականությունների կատարման նկատմամբ)։

1. Մանկավարժական աշխատողը խնդրահարույց իրավիճակների դեպքում ծնողի հետ պատշաճ կապ չի հաստատել, իսկ ծնողը իրազեկ չի եղել խնդիրների քննարկման ներքին կարգի մասին։

Խախտվել է՝

• ՀՀ ԿԳՄՍ նախարարի 2023 թվականի փետրվարի 24-ի N 10-Ն հրամանի հավելվածի 6-րդ կետի՝
• 5-րդ և 6-րդ ենթակետերը՝

«Խնդրահարույց իրավիճակ առաջանալու դեպքում մանկավարժական աշխատողը պարտավոր է հարցը պարզաբանել սովորողի ծնողի հետ, անհամաձայնության դեպքում դիմել դասղեկին կամ տնօրենին, ինչպես նաև ծնողին իրազեկել դպրոցում հարցերի լուծման ընթացակարգերի մասին»։

Դպրոցի տնօրենությանը տրվել է կարգադրություն՝

1. Ապահովել հոգեբանի և դասվարի պաշտոնային պարտականությունների պատշաճ կատարումը՝ հաշվի առնելով Հանրապետական մանկավարժահոգեբանական կենտրոնի եզրակացություններն ու առաջարկությունները։
2. Պահպանել մանկավարժական վարքագծի կանոնները և ամրապնդել ծնող–դպրոց համագործակցությունը՝ սովորողի անվտանգ և հոգատար կրթական միջավայրի ապահովման նպատակով։
3. Համագործակցել Ալավերդու տարածքային մանկավարժահոգեբանական կենտրոնի հետ՝ սովորողի աջակցման գործընթացի շարունակականությունն ապահովելու համար։

    Կրթության տեսչական մարմինը կարևորում է կրթական հաստատության կողմից ձեռնարկվող քայլերը՝ ուղղված սովորողների անհատական կարիքների ճանաչմանն ու բավարմանը, ինչպես նաև հոգեբանական աջակցության համակարգի ամրապնդմանը։ Դպրոցի կողմից վերոնշյալ խախտումների վերացումը կնպաստի երեխայի կրթական իրավունքի լիարժեք իրացմանը և դպրոցում ներառական կրթության մշակույթի զարգացմանը՝ ի նպաստ բոլոր սովորողների բարեկեցության։